حذف بياناتك

آخر تحديث: 10 أكتوبر 2026

تقدر تمسح حسابك على Arabio، وكل اللي فيه، في أي وقت. الصفحة دي بتوضح إزاي، وإيه اللي بيتمسح، وإمتى.

امسح حسابك من التطبيق: افتح Arabio وروح الإعدادات ← حذف الحساب (على الويب: app.arabio.io/settings/delete). أكّد بكلمة المرور — ولو بتدخل بـ Google أو Facebook ممكن نطلب منك تسجّل دخول تاني — وبعدين دوس «احذف حسابي».

إيه اللي بيتمسح: حسابك وكل اللي فيه — بروفايلك، ومنشوراتك، وتعليقاتك، وتفاعلاتك، وصورك، وفيديوهاتك، والريلز، والستوري، والألبومات، والرسايل اللي بعتها، والجروبات اللي كنت لوحدك فيها، وإيفنتاتك، وتذاكرك، وإعلاناتك، وأصحابك واللي بتتابعهم، وطرق دخولك (ومنها الربط بـ Facebook أو Google)، وأجهزتك وجلساتك. الجروبات وشاتات الجروب اللي كنت فيها مع ناس تانية بتفضل ليهم، من غيرك.

إمتى: على طول. حسابك بيتمسح أول ما تأكّد ومش هنقدر نرجّعه، وصورك وفيديوهاتك بتتشال من التخزين عندنا في نفس الوقت. النسخ الاحتياطية لقاعدة البيانات (علشان نرجّع الخدمة لو حصل عطل) ممكن يفضل فيها المحذوف لحد 30 يوم قبل ما يتكتب عليه.

استثناء واحد بيفرضه القانون: لو صورة رفعتها اتوقفت للمراجعة علشان ممكن تكون فيها إساءة جنسية لأطفال، بنحتفظ بنسخة مؤمّنة منها للجهات المختصة ومش بتتمسح مع الحساب.

شيل Arabio من Facebook: على Facebook روح الإعدادات والخصوصية ← الإعدادات ← التطبيقات والمواقع، اختار Arabio ودوس إزالة. Facebook بيبلّغنا. لو Facebook هو الطريقة الوحيدة اللي بتدخل بيها Arabio، بنمسح حسابك على Arabio وكل اللي فيه، بالظبط زي «حذف الحساب». ولو بتدخل كمان بطريقة تانية (كلمة مرور أو Google أو مفتاح مرور)، بنمسح الربط بين حسابك على Facebook وArabio (رقم Facebook اللي كان متخزن عندنا) وبنطلّع حسابك من كل الأجهزة. Facebook بيديك كود تأكيد ولينك للصفحة دي، تقدر تشوف منها اللي اتعمل.

لو حسابك فضل موجود (علشان بتدخل بطريقة تانية كمان): Facebook ادانا بس رقم Facebook واسمك وإيميلك — عمره ما ادانا صورة. اسمك وإيميلك بقوا جزء من حسابك، ومش بنحتفظ بنسخة منفصلة من اللي Facebook بعته، فمنقدرش نعرف إذا كانوا لسه زي اللي على Facebook. ولأنهم الطريقة اللي بتدخل بيها واللي الأعضاء بيعرفوك بيها، بيفضلوا. غيّر اسمك من «تعديل البروفايل»، أو امسح الحساب زي ما فوق علشان كل حاجة تتشال.

مش عارف تدخل؟ دوس «محتاج مساعدة؟» في شاشة الدخول، أو ابعت إيميل على support@arabio.io من الإيميل اللي على حسابك، وإحنا نساعدك تمسحه.

أسئلة: ابعت إيميل على support@arabio.io. وبنرد عليك بالإيميل.